Salland Low Saxon of Lutten, Northeastern Overijssel, Netherlands

Listen to this translation narrated with native pronunciation:

[Download mp3]

Translation and Narration: Dick van Faassen

Location: Borne, Overijssel, Netherlands

Transliteration: Reinhard F. Hahn

Language information: [Click]

[German Spelling] [Dutch Spelling]    

’t Winterkoninkien

’t Winterkoninkien had sien Nüst eboud in de Wagenschüre. Op ’n Kehr waren allebeide de Olden üüt’eflögen — se wollen wat Eten för de Jonkies halen — en se hadden hör Kleinties helemaole alleenig elaoten.

Nao ’n Tiedlang kümp de Va weer bi'j Hüüs. „Wat is hier gebört?“ segg e, „Wie heff u wat edaone, Kinder? Ie bint jao helemaole verschrickt?“

„Och, Va,“ seggt se, „D’r kwamp hier nett so’n grote Bülleback vörbi'j. Die sagg d’r so gemeen en grouelik üüt. Hi'j glupten mit sien grote Ogen so ons Nüssien binnen. En daor binne wi'j so benaut van ewörden.“

„So,“ segg de Va, „Waor is e hen’egaohne?“

„Nou,“ seggt se, „Hi'j is die Kaante üüt’egaohne.“

„Wach eempies!“ segg de Va, „Ik gaoh d’r drekt achteran. Stille maar, Kinder! Ik sall ’m well kriegen ...“

En hi'j flögg d’r achteran.

As e de Huuk ümme kümp, is ’t een Leeu, die daor löpp.

Maar ’t Winterkoninkien is niet bange üüt’efallen. Hi'j gieht bi'j de Leeu op de Rügge sitten en begünnt ’m üütteschelden. “Wat he’j bi'j mi'j bi'j ’t Nüst te süken, ieje?!” segg e hellig, “en mien Jonkies benaut te maken?!”

De Leeu treckt ’m d’r niks van an en löpp gewohn wieder.

Nou begünnt dat kleine Krümmeltien noch helliger antegaohn. „Ie hebbt daor helemaole niks te süken, vertell ik u! En a’j noch es weer dorft te kommen,” segg e, “dann sü’j ’t well marken! Ik du ’t niet grage“ — en hi'j hold sien iene Potien in de Lücht — „mar aanders mü’k u de Rügge dör de Midden trappen!”

Daornao flögg e weer naor sien Nüst hen.

„So, Kinder,“ segg e, „Die he’k dat moi of’elehrt. Die kümp hier noit weer!“