Mohawk

Could this be you? Click to help!

Listen?

Translator: Wesley “Tehawennahkwa” Miller

Location: Ohsweken, Six Nations Reserve, Ontario (Canada)

Facilitator: Mike Szelog

Language information: [Click]

[Official Spelling] [Alternative Spelling]

Kanonhsanòn:we’s

Akohsaténhshne wahatsinahkón:ni ne kanonhsanòn:we’s. Sewenhní:sera, tehniiáhsen ronatehià:ron otsi’tén:’a wahní:ten – tehonatonhwentsió:ni ahnikhwakóha sok ahonwatíkhwanonte táhnon rononhá:’ok wahonwanátka’we ne otsi’tén:’a owí:ra.

Onhwá:tsi niá:re, roti’níha tontà:rawe tsi katsinahkwáhere.

“Oh na’á:wen’ne kén:tho?” wahén:ron. “Ónhka wa’etsíhteron’ne, kwaién:’a? Wé:ne tsi kwah í:ken tsi sewahterón:ni!”

“Ó: rákeni,” wahonní:ron, “ónhka’k rakowá:nen táhnon raia’tahétken ken’ ì:re’skwe ken’ nahé:’a. Kwah í:ken tsi ióhteront! Onkwatsináhkwakon wa’thaká:neren, tehakahrowá:nen táhnon wahshonkwáhteron’ne!”

“Hao’ ki,” wahén:ron ne roti’níha, “ka’ nón:we wà:re?”

“Ah,” wahonní:ron, “é’tho nonkwá:ti wà:re – tsi karhá:kon nonká:ti.”

“Ken’ sewaterhá:rat!” wahén:ron ne roti’níha. “Enhíhsere. Tóhsa sewaten’nikonhrhá:ren, tóhske tsi enhiié:na.” E’thó:ne tahatáhsawen karhá:kon tahá:ten.

Sénha í:non tsi karhá:kon wa’thá:ten, e’thó:ne iahatkarenhrá:ko, e’thó:ne ó:nen wahoia’tatshén:ri ne kèn:reks. Nek tsi iah othé:nen tehohterón:ni ne kanonhsanòn:we’s. Kèn:reks rahsòn:ne wa’thá:ta’ne ne kanonhsanòn:we’s táhnon tahatáhsawen tahohén:rehte. “Oh nontié:ren tsi é’tho íhse’skwe tsi tiakwatsinahkwáhere,” wahén:ron, “táhnon wahshéhteron’ne ne kheien’okón:’a?!”

Click to help! · Another American language? Veuillez cliquer pour aider! · Une autre langue américaine ? ¡Haga un clic para ayudar! · ¿Otra lengua americana? Clique para ajudar! · Outra língua americana? Щелкните, чтобы помочь! · Сибирский язык?

Iah othé:nen tehotahonhsiióhston ne kèn:reks táhnon shé:kon tehathaháhkwa.

Ó:nen nón:wa kwah í:ken tsi rona’khwén:’on ne kanonhsanòn:we’s táhnon tahatáhsawen sénha io’shátste táhnon sénha iorá:kahre tahohén:rehte. “Satahónhsatat ó:nen – iah othé:nen tesarì:waien tsi tiakwatsinahkwáhere! Táhnon tóka’ nonwén:ton iaonsáhse,” wahén:ron “tóhske tsi enhserihwatshén:ri – iah tha’tewakatonhwentsió:ni nakátiere,” wahén:ron, táhnon tahatáhsawen ahathsinakará:tate, “nek tsi tóhske tsi tenkonhswáia’ke nó:nen enkonhsó:ka’te!”

Ó:nen’k tsi róhson, tsi thatitsinahkwáhere nonká:ti tonsahá:ten.

“É’tho ó:nen, kwaién:’a”, wahén:ron, “tóhske tsi wahihró:ri ne thí:ken kèn:reks. Iah nonwén:ton á:re ken’ thaontontà:re.”